З просьбай паспрыяць у выдачы гуманітарных візаў беларусам у Грузіі звярнуўся ў Міністэрства замежных справаў Польшчы кіраўнік Народнага антыкрызіснага ўпраўлення Павел Латушка. У адказе з ведамства, які палітык атрымаў 27 лістапада, паведамлялася, што польскія консулы «надаюць асаблівую ўвагу пытанням падтрымкі грамадзян Беларусі, якія пераследуюцца рэжымам Лукашэнкі і ратуюцца ад рэпрэсій».
У сваім звароце палітык нагадаў, што пасля пратэстаў 2020 года «значная колькасць грамадзян Беларусі была вымушаная пакінуць краіну».
«Грузія стала адным з асноўных напрамкаў для беларусаў дзякуючы бязвізаваму рэжыму і прамым авіязносінам. Да нядаўняга часу Грузія ўспрымалася як адносна бяспечны прытулак, аднак сацыяльна-палітычная сітуацыя ў Грузіі, якая цяпер змянілася, выклікае асцярогі», — напісаў Павел Латушка, папрасіўшы МЗС Польшчы паспрыяць беларусам у Грузіі падчас звароту па гуманітарныя візы.
Адказ з польскага замежнапалітычнага ведамства прыйшоў за подпісам намесніцы кіраўніка МЗС Хенрыкі Машчыцкай-Дэндыс.
«Грамадзяне Беларусі, якія знаходзяцца ў Грузіі, маюць права падаць заяўку на польскую візу толькі на падставе самога факту знаходжання на тэрыторыі Грузіі (цягам не менш чым шэсць месяцаў) без неабходнасці легалізацыі свайго знаходжання», — гаворыцца ў лісце.
У МЗС Польшчы дадалі, што ведамства ўвяло «асаблівыя меры для аператыўнай выдачы гуманітарных віз асобам з беларускай апазіцыі ў сувязі з сітуацыяй у Грузіі, а таксама для надзённага абслугоўвання грамадзян Беларусі, якія ўцягнутыя ў прадэмакратычную дзейнасць і імкнуцца заехаць у ЕС».
«Мы ўдзячныя польскім уладам за спрыянне грамадзянам Беларусі, якія пераследуюцца рэжымам Лукашэнкі. Важна, каб беларусы маглі разлічваць на атрыманне польскай візы, асабліва ў выпадках, калі яны зазнаюць палітычны пераслед з боку рэжыму Лукашэнкі, і іх жыццю пагражае рэальная небяспека», — адзначыў Павел Латушка.
Чытайце таксама
