На таргі на пляцоўцы «БелЮрЗабяспечанне» трапілі, відавочна, мэбля і тэхніка з мінскіх кватэраў Валерыя Цапкалы і Сяргея Ціханоўскага. Да такой высновы прыйшло «Люстэрка», падрабязна вывучыўшы абвесткі пра продаж гэтых рэчаў і самой нерухомасці. Нагадаем, жыллё экс-кіраўніка ПВТ напярэдадні выставілі на таргі, а кватэру блогера з трэцяй спробы прадалі на аўкцыёне 26 ліпеня мінулага года.
Падобна да таго, што паралельна з продажам на таргах кватэраў Цапкалы і Ціханоўскага на аўкцыён выставілі таксама маёмасць з гэтага арыштаванага жылля. Растлумачым падрабязней, як мы прыйшлі да такой высновы. У абвестках на «БелЮрЗабяспечанні», якія датычаць продажу на таргах нерухомасці, пазначаецца, каму яна належыць, а ў выпадку з мэбляй і тэхнікай — не. Да прыкладу, дакладна гэтак жа прадаюць праз крамы канфіскату канфіскаваныя тэлефоны (у тым ліку па палітычных справах), на іх няма звестак ранейшых уладальнікаў.
Але калі ўводзіш у пошукавым радку на сайце «БелЮрЗабяспечання» імя канкрэтнага чалавека, то сістэма выдае не толькі яго нерухомасць, але таксама мэблю і тэхніку, якія яму належалі і якія трапілі на аўкцыён.
Так, на запыт «Тихановский Сергей Леонидович» сайт «БелЮрЗабяспечання» выдае тры абвесткі пра аўкцыён па продажы кватэры сям'і Ціханоўскіх, а ніжэй — яшчэ 25 пазіцый, сярод якіх ёсць мэбля, бытавыя прыборы, столевыя лямпы. Прадавалі нават панель ад дамафона з кнопачкай і сам дамафон, праўда, потым іх знялі з рэалізацыі. Пры гэтым імені ўладальніка няма ў гэтых абвестках.
Аднак інтэр'ер мінскай трохпакаёўкі Ціханоўскага нетыповы, у ім ёсць запамінальныя дэталі. І дакладна такі ж дызайн — на многіх фота тых самых 25 рэчаў, якія выстаўлялі раней на таргі. Практычна на ўсе тавары цэны былі зніжаныя, такое адбываецца, калі лоты не прадаюцца. Цяпер маёмасць з кватэры рэалізаваная. Да прыкладу, кававарку Lavazza купілі за 20 рублёў замест першапачатковых 100.
Калі ўвесці ў пошук на сайце «БелЮрЗабяспечання» запыт «Цепкало Валерий Вильямович», то сістэма выдае трохпакаёвую кватэру і маёмасць — камоду, канапу, ложак і лядоўню. Прычым лядоўню ўжо прадалі за 1900 рублёў.
Журналіст «Люстэрка» патэлефанаваў прадаўцу, які пазначаны на сайце «БелЮрЗабяспечання», каб даведацца падрабязнасці пра прадаваныя рэчы, як мяркуецца, з кватэры Валерыя Цапкалы. Для прыкладу ўзялі двухспальны ложак за 350 рублёў.
— Мы не ведаем, каму належыць маёмасць, якая прадаецца ў інтэрнэт-краме. Вы можаце яе адкласці, а потым прыехаць на склад і паглядзець яе стан. Калі рэч падыдзе, тады яе можна купіць, — паведаміла супрацоўніца інтэрнэт-крамы.
Мы задалі пытанне Валерыю і Вераніцы Цапкалам, ці з іх выстаўленай на таргі мінскай кватэры гэтыя мэбля і тэхніка, але не атрымалі адказу.
Нагадаем, Сяргей Ціханоўскі — блогер, муж кандыдаткі ў прэзідэнты на выбарах 2020 года Святланы Ціханоўскай. Перад самым пачаткам выбарчай кампаніі яго арыштавалі нібыта за арганізацыю несанкцыянаванага мерапрыемства. Ён быў асуджаны на 18 гадоў пазбаўлення волі ў калоніі ўзмоцненага рэжыму.
Валерый Цапкала ў мінулым кіраваў беларускім Паркам высокіх тэхналогій. Для ўдзелу ў прэзідэнцкай кампаніі 2020 года ён сабраў ініцыятыўную групу, ездзіў па краіне. Аднак ЦВК адмовіў яму ў рэгістрацыі праз тое, што сабраных подпісаў пасля праверкі аказалася менш за сто тысяч. Калі палітыка не дапусцілі да ўдзелу ў выбарах, яго жонка Вераніка далучылася да аб’яднанага штаба Святланы Ціханоўскай. Валерый Цапкала пакінуў краіну ў ліпені 2020 года, асцерагаючыся пераследу. 9 жніўня з Беларусі з’ехала і Вераніка. Сям’я Цапкалаў асталявалася ў Латвіі. На радзіме Валерыя Цапкалу завочна асудзілі на 17 гадоў калоніі ўзмоцненага рэжыму.
Чытайце таксама
