Часовага паверанага ў справах Беларусі 1 жніўня выклікалі ў Міністэрства замежных справаў Польшчы, дзе яму заявілі рашучы пратэст праз інцыдэнт з беларускімі верталётамі, якія, як сцвярджаецца, 1 жніўня парушылі паветраную прастору краіны. Пра гэта расказаў RMF FM намеснік міністра замежных справаў Польшчы Павел Яблоньскі.
Размова з беларускім дыпламатам у МЗС была «вельмі кароткай».
— Мы выказалі рашучы пратэст у сувязі з парушэннем паветранай прасторы, а таксама з эскалацыяй дзеянняў супраць Украіны, бо Беларусь таксама замяшаная ў гэтую вайну, — паведаміў Яблоньскі.
Ён таксама падкрэсліў, што беларускаму боку перадалі і іншыя прэтэнзіі. У прыватнасці, Варшава адзначыла зніжэнне ўзроўню бяспекі на мяжы з прычыны перамяшчэння ў нашую краіну наймітаў ПВК Вагнера, а таксама праз спробы мігрантаў незаконна перасекчы беларуска-польскую мяжу.
— Мы супраць гэтага і будзем абараняцца, — адзначыў Яблоньскі.
Нагадаем, 1 жніўня ў небе над польскай вёскай Белавежа ў Падляшскім ваяводстве паблізу польска-беларускай мяжы заўважылі беларускія вайсковыя верталёты. Мясцовыя жыхары ўпэўненыя, што верталёты праляцелі проста над вёскай, OSINT-расследавальнікі кажуць пра залёт углыб польскай тэрыторыі на тры кіламетры. Але ў аператыўным камандаванні Узброеных сіл Польшчы запэўнівалі, што парушэння паветранай прасторы зафіксавана не было.
Увечары 1 жніўня Міністэрства абароны Польшчы заявіла, што парушэнне паветранай прасторы краіны беларускімі вайсковымі верталётамі ўсё ж было. Адзначаецца, што перасячэнне мяжы адбылося ў раёне Белавежы на вельмі малой вышыні, што абцяжарыла яго выяўленне радыёлакацыйнымі сістэмамі.
Беларусь адхіліла абвінавачанні ў парушэнні паветранай прасторы Польшчы.
У Пентагоне ў сувязі з інцыдэнтам паведамілі, што працягваюць «вельмі сур’ёзна ставіцца да бяспекі NATO».