З лютага перагледзяць дапамогі на дзяцей да трох гадоў і працоўныя пенсіі. Таксама з наступнага месяца вернуць збор за перасячэнне транспартнымі сродкамі дзяржмяжы ў пунктах пропуску. «Люстэрка» сабрала лютаўскія новаўвядзенні, якія паўплываюць на таўшчыню кашалькоў беларусаў.
Пенсіянеры атрымаюць прыбаўку
З 1 лютага вырастуць працоўныя пенсіі — у сярэднім на 10%. Нагадаем, раней міністр працы і сацыяльнай абароны Наталля Паўлючэнка анансавала, што ў 2025 годзе пенсіі вырастуць на 15%.
У канцы студзеня ўлады павінныя агучыць, як з 1 лютага зменяцца мінімальныя працоўныя і сацыяльныя пенсіі. Іх пераглядаюць раз на квартал, іх памер прывязаны да бюджэту пражытачнага мінімуму. Да прыкладу, сацпенсія цяпер складае 218,9 рубля.
Вырастуць дапамогі на дзяцей
З наступнага месяца таксама падымуць дапамогі па доглядзе дзіцяці ва ўзросце да трох гадоў. Гэта планавы перагляд памеру дапамог у залежнасці ад змянення сярэдняй зарплаты па краіне за папярэдні квартал.
З 1 лютага таксама павінныя перагледзець памер аднаразовых выплат у сувязі з нараджэннем дзіцяці. Яны залежаць ад памеру бюджэту пражытковага мінімуму, але дакладных лічбаў яшчэ не агучылі.
Новаўвядзенні ад мабільных аператараў
Мабільныя аператары анансавалі на люты змяненні для сваіх кліентаў. Да прыкладу, кампанія МТС з пачатку наступнага месяца перастане даваць зніжку па сэрвісе «TWIN-карта». Як удакладняе кампанія, аплата з гэтай даты будзе ісці штомесяц. Гэты сэрвіс дазваляе актываваць дзве сім-карты з адным абаненцкім нумарам. Дзякуючы гэтаму можна паралельна выкарыстоўваць некалькі прыладаў і быць актыўнымі ў сетцы гэтага мабільнага аператара.
Змяненне для тых, хто здае ў арэнду нерухомасць
З лютага вырастуць стаўкі падаходнага збору для тых, хто здае ў арэнду нерухомасць. Да прыкладу, у Мінску гэты падатак за здачу аднаго пакоя паднялі да 50 рублёў. За студзень гэтая стаўка складае 47 рублёў. Рост — на 6,4%. Гаворка ідзе пра фізічных асоб, якія здаюць жыллё без рэгістрацыі ІП.
Змяненні ад банкаў
З 17 лютага «Альфа-Банк» увядзе камісію за расходныя аперацыі за межамі Беларусі, здзейсненыя з выкарыстаннем картак міжнародных аплатных сістэм.
У «Беларусбанка» з 1 лютага з’явяцца змяненні па некаторых картках.
Змяненні для тых, хто выязджае за мяжу
З 1 лютага ў некаторых абласцях вернуць мясцовы збор за перасячэнне транспартнымі сродкамі дзяржмяжы ў пунктах пропуску. Ён складае адну базавую велічыню — 42 рублі. Гаворка пра Гродзенскую, Брэсцкую і Віцебскую вобласці.
Чытайце таксама
