BNS: Дэпартамент дзяржбяспекі Літвы падазрае Карач у супрацоўніцтве з расійскай разведкай. Сама актывістка называе гэта «паклёпам»

21 жнiўня 2023 у 1692621780
«Зеркало»

Дэпартамент дзяржбяспекі (ДДБ) Літвы падазрае дырэктарку грамадзянскай ініцыятывы «Наш дом» Вольгу Карач у супрацоўніцтве з расійскай разведкай. Пра гэта паведамляе літоўскае інфармацыйнае агенцтва BNS са спасылкай на дакумент, які ёсць у распараджэнні рэдакцыі. Сама актывістка гэтыя абвінавачванні называе «поўнай лухтой» і «паклёпам».

Выданне сцвярджае, што менавіта на гэтай падставе Карач адмовілі ў прытулку ў Літве.

«Паводле звестак ДДБ, актывістка беларускай апазіцыі Карач, якая пражывае ў Літве, супрацоўнічала з расійскай разведкай», - гаворыцца ў дакуменце, які ёсць у распараджэнні BNS.

У дакуменце гаворыцца, што Карач нібыта наведвала Расію ў 2015−2019 гадах, дзе сустракалася з прадстаўнікамі расійскай разведкі, падтрымлівала з імі кантакт з дапамогай «абезаблічаных сродкаў сувязі» і перадала «падрыхтаваныя ёю дакументы асобам, звязаным з расійскай разведкай, перадала інфармацыю пра прадстаўнікоў беларускага рэжыму і апазіцыю і іх дзейнасць», піша BNS.

«Прадстаўнікі расійскай разведкі клапаціліся пра імідж В. Карач у Літве і за мяжой, давалі парады і прапановы ў дзейнасці ў публічнай прасторы, папярэджвалі і інструктавалі, як знізіць рызыкі», - цытуе дакумент BNS.

Сама Карач катэгарычна абвяргае, што супрацоўнічала са спецслужбамі Расіі і Беларусі. Агучаныя абвінавачанні ў каментары Delfi яна назвала «поўнай лухтой».

- Я ні з кім не супрацоўнічала і не магла супрацоўнічаць. Я не супрацоўнічала ні з якімі інстытутамі варожых краін - ні Беларусі, ні Расіі. Я ніколі не супрацоўнічала, я не ведаю, хто што кажа, калі ў іх ёсць іншая інфармацыя, хай публікуюць, - сказала Карач, падкрэсліўшы, што яе «абгаварылі».

Актывістка таксама дадала, што 22 жніўня плануе правесці прэс-канферэнцыю, падчас якой «раскажа больш».

- Магу паклясціся Бібліяй ці чым заўгодна, што я ніколі не наносіла шкоды Літве, нікому не перадавала ніякай інфармацыі, звязанай з Літвой, і не супрацоўнічала ні з якімі спецслужбамі. Я магу паклясціся крывёю, - сказала яна.

Вольга Карач - актывістка, кіраўніца цэнтра грамадзянскіх ініцыятываў «Наш дом». У верасні 2021 года КДБ уключыў Карач у «спіс тэрарыстаў», а МУС у траўні 2022 года абвясціла арганізацыю «Наш дом» «экстрэмісцкім фарміраваннем».

Улады Беларусі анулявалі беларускі пашпарт Вольгі Карач. Пра гэта стала вядома ў снежні 2022 года, калі актывістку знялі з самалёта ў Рыме.

Чытайце таксама