МЗС РФ упэўненае, што ў Польшчы ёсць прэтэнзіі на беларускія землі

13 студзеня 2023 у 1673595660
«Зеркало»

Расію непакояць напамінкі пра Рэч Паспалітую «ад мора да мора» і яе «ўсходнія крэсы». Пра гэта заявіў у інтэрв'ю ТАСС дырэктар другога дэпартамента краін СНД МЗС Расіі Аляксей Палішчук.

Ён адзначыў, што ў апошнія гады NATO нарошчвае сілы ў Польшчы і краінах Балтыі.

«Наколькі вялікія рызыкі правакавання эскалацыі і нанясення ўдараў з боку Польшчы супраць Беларусі - гэта пытанне да ваенных аналітыкаў. Нагадаю толькі, што Расія і Беларусь фармуюць адзіную абаронную прастору і звязаныя адпаведнымі абавязаннямі. Любыя спробы нанясення такіх удараў асуджаныя на правал. Заходнія рубяжы Саюзнай дзяржавы надзейна абароненыя Узброенымі сіламі Беларусі і сумеснай расійска-беларускай рэгіянальнай групоўкай войскаў», - заявіў Палішчук.

Ён таксама звярнуў увагу «на размовы пра польскія прэтэнзіі на землі Беларусі».

«Што да размоваў пра польскія правы на беларускія землі, то напамінкі пра Рэч Паспалітую "ад мора да мора" і яе "ўсходнія крэсы", вядома, не могуць не непакоіць не толькі Беларусь, але і Расію як найбліжэйшага саюзніка. Нягледзячы на тое, што такія заявы гучаць пераважна з вуснаў польскіх палітолагаў і экспертаў, яны не спрыяюць разрадцы і без таго напружанай абстаноўкі ў рэгіёне», - сказаў прадстаўнік расійскага МЗС.

Нагадаем, расійскае кіраўніцтва працягвае настойваць, што Польшча рыхтуецца анексаваць тэрыторыю Заходняй Украіны і частку Беларусі. У гэтым перакананыя і беларускія ўлады.

«Яны (Польшча. - Заўв. рэд.) ужо гатовыя частку Украіны адхапіць, Беларусь яны цалкам гатовыя праглынуць. Не атрымаецца. Гэта дачаснікі. Там няма з кім сёння размаўляць», - заяўляў у жніўні мінулага года Аляксандр Лукашэнка.