СМІ паведамляюць пра затрыманне Сяргея Патупчыка, сына экс-міністра энергетыкі. Даведаліся, што пра гэта вядома

9 студзеня 2023 у 1673269680
«Зеркало»

Сёння, 9 студзеня, выданне «Наша Ніва» паведаміла пра затрыманне па крымінальным артыкуле сына былога міністра энергетыкі Уладзіміра Патупчыка Сяргея. Ён працаваў намеснікам генеральнага дырэктара па эканоміцы вытворчага аб'яднання «Беларуснафта». Як даведалася «Люстэрка», на працоўным месцы мужчыны няма. І калі будзе, невядома. Між тым выданне «Флагшток» са спасылкай на свае крыніцы паведамляе, што Патупчыка затрымалі за каментар у падтрымку Украіны.

Выданне «Наша Ніва» паведамляе, што Сяргея Патупчыка затрымалі два тыдні таму. Паводле звестак выдання, таксама затрымалі некалькі менеджараў прадпрыемства ў Гомельскай вобласці. Дакладная прычына прэтэнзій да іх не вядомая.

Між тым намеснік генеральнага дырэктара на працоўным месцы цяпер адсутнічае. Пра гэта расказала яго сакратарка, калі журналістка «Люстэрка» патэлефанавала ў прыёмны пакой пад выглядам яго калегі:

- Сяргея Уладзіміравіча цяпер няма, ёсць выканаўца яго абавязкаў.

- А доўга яго не будзе?

- Так, дастаткова. Таму калі вам ён патрэбны па нейкім пытанні, вы можаце мне яго агучыць, я вам дапамагу з кімсьці звязацца.

Акрамя гэтага, на самім сайце «Беларуснафты» з графы «Дырэктарат» таксама знікла імя Сяргея Патупчыка.

Выданне «Флашток» паведамляе, што Патупчыка затрымалі за пост у падтрымку Украіны. Паводле версіі выдання, 26 лютага ён напісаў у сваім Instagram: «Fuck war. Kyiv in my heart!» («Да д'ябла вайну. Кіеў у маім сэрцы!»). Пры гэтым афіцыйных пацверджанняў таму, што гэта стала прычынай затрымання, няма.

Нагадаем, у 2018 годзе Уладзіміра Патупчыка адправілі у адстаўку з фармулёўкай «за спрыянне незаконнаму сямейнаму бізнесу». На пасадзе міністра ён быў з 2013 года.